يا تنتجوا يا تشحتوا .. 9 اكتوبر 2011

من اكبر مساوئ عصر مبارك ان انتاجنا من كل حاجة انتهى باستثناء الصناعات الملوثة للبيئة المخلوع وضع و نفذ مخطط شيطاني لألغاء قدرة مصر و شعبها على الأكتفاء الذاتي من السلع الاستهلاكية الأساسية حتى زراعة القطن المصري طويل التيلة افخم و اغلى انواع القطن الخام في العالم تم تدميره بفعل بذور قطن اسرائيلية و هنا جه دور المعونة و مش معونة من اي حد دي معونة من ادارة الولايات المتحدة الأمريكية اللي جوعت شعبها و افلست خزانتها العامة دعما للصهيونية و الكيان الصهيوني و احنا كشعب كنا متقسمين طبقات و تصنيفات و كل واحد مننا مطالب بحاجة الأثرياء يسرقوا و مايهمش المحترمين من الأثرياء مع الطبقة الوسطى يشتغلوا زي الثيران المربوطة في سواقي و مايفكروش سكان العشوائيات يحششوا او يستحملوا رزالة امناء الشرطة عليهم و هما بيتنططوا من اتوبيس لأتوبيس و من مترو لمترو ورا لقمة العيش و مايفكروش لأن النظام بيشحت عليهم من نظام دولة حاطة رجل اقل عامل نظافة فيها في وش رأس الدولة المصرية  وبيملوا شروطهم عليه و هو راضي و مبسوط عشان بطنه مليانة
المفروض ان بعد الثورة الوضع ده يتغير نزرع لقمتنا بايدنا ننقذ زراعة القطن المصري نستغل مصارف المية في زراعة شجر التوت و تغذية دودة الحرير نكتشف و نستغل ثروتنا…مالأخر كده يعني ننتج…هو ده المفروض او المفرود و المفرود في مصر عند المكوجي لأن فيه خبير استرايجي عبقري عمري ما سمعت عنه قبل النهارده و هو اللواء سامح سيف اليزل ليه وجهة نظر تانية خالص تعالوا نسمعها يمكن نستفيد من خبرته العميقة سيادة اللواء قال في مداخلة تليفونية ليه من في برناج 90 دقيقة اننا لازم نفرج عن الجاسوس الأسرائيلي ايلان جرابيل حرصا على المعونة الأسرائيلية و ان تطبيق القانون على الجاسوس الأسرائيلي في عز ما احنا بنحلم بدولة القانون بمحاكمة و سجن الجاسوس لا يعود بأي فائدة على الشارع المصري
يعني سيادة اللواء بيطالبنا باننا ننسى حلم دولة القانون و نفرج عن جاسوس عشان يبقى لينا عين نذل نفسنا و نشحت مالأمريكان تاني بدل ما سيادة الخبير الأستراتيجي يطالبنا باننا ننتج عشان مانتذلش للأمريكان تاني او حتى ينحصنا بمقايضته باسرانا اللي هناك
انا فوضت امري لله في امثال سيادة اللواء سامح سيف اليزل و ياريت لو حد يعرف مين الشخص ده اصلا يعرفني يمكن اعرف اصراره على البقاء على نظام الشحاتة
و كلمة اخيرة لسيادة الخبير الأستراتيجي اللي انا ماعرفهوش و لكل المصريين و على رأسهم من يسمون انفسهم بالنخبة
اختاروا حل مالأتنين:يا تنتجوا يا تشحتوا
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s