محاولة للتفهم و تقريب وجهات النظر .. 19 اغسطس 2011

هذه الأيام و نحن نعيش جو نظرية المؤامرة و التخوين لأبعد الحدود من ناحية و من ناحية اخرى نعيش في جو اغنية(واه يا عبد الودود)للمبدع الشيخ امام رحمه الله و بعد مشاهدتي لفيديو حرق دم اللي جابو اهلي عن الأشتباكات التي حدثت بين أهالي الشهداء و أنصار المخلوع امام اكادمية الشرطة(اكادمية مبارك للأمن سابقا)و التي يحاكم في الرئيس المخلوع و نجليه و وزير داخليته الأسبق و عدد من مساعديه تخيلت في محاولة للتفهم و تقريب وجهات النظر مناقشة بيني و بين أحد أنصار المخلوع و قررت ان ابدأ كلامي بالفساد التعليمي حيث ان احب الناس اللي قلب اي شخص سوي العقل و الفطرة بعد الله و رسوله هم ابناءه و بناته و احفاده حيث انه يحبهم أكثر مما يحب نفسه فتسألت قائلة للشخص الذي تخيلته من انصار المخلوع:يعني انت يرضيك ان حسني يجيب واحد نسيبه دكتور اطفال يمسكه وزارة التربية و التعليم لحد ما العيال ولادك ولاد كل الناس التانية جالهم غباء و مخاخهم بقت طرية زي البلوظة و مابقاش فيها معلومة مفيدة توحد ربنا؟فيرد علي قائلة:مش مهم العيال اذكية و لا اغبية المهم نسر اكتوبر لا يهان؟فقلت لنفسي يمكن قرفانين من العيال و مضحيين بيهم(بس يجوروا على حق الناس اللي خايفة على ولاده ليه؟)فجيت من ناحية تانية و تسألت قائلة؟طب و الأدوية الفاسدة و الأكل المسرطن و الخضار المسقي بمية المجاري و اللي بسببها صحتك و صحة الناس كلها بقت في الحضيض؟فيرد قائلا:مش مهم صحتي و لا صحة الناس المهم كرامة بطل مصر فقلت لنفسي يمكن يكونوا اصلا طهقانين من عيشتهم و ناويين ينتحروا ببطئ(بس يخونوا الناس اللي عاوزة صحتها تبقى أحسن ليه؟)فجيت من ناحية تانية و تسألت قائلة:طب و الحريات ده انتم كنتم بتروحوا الأنتخابات و و بتصوتوا و مطاوي البلطجية في ظهوركم و الأمان و الوحدة الوطنية اللي هوه فرط فيهم كلهم عشان يفضل عالكرسي؟فرد قائلا:شكليات و كلا فاضي المهم بطل الحرب و السلام يكون شبعان و مدفي قلت بجملة سيناريو الأنتحار البطئ هما مستغنيين عن الأمن و الأمان و الوحدة و الحرية(طب ما يسيبوا الناس اللي عاوزة تعيش يطالبوا بيها و لا هوه نكد و خلاص؟)فجيت من ناحية تانية و  تسألت قائلة:طب و كرامة مصر و المصريين قدام العالم و مية النيل اللي كانت هاتقطع عننا بسبب وزراء خارجيته و سفراءه و قناصله مالهاش اي اعتبار؟فيرد قائلا:كرامة مصر من كرامة رمز مصر و على فكرة احنا ممكن نعيش على المياه الجوفية كويس جدا(ده طبعا و هوه مش مدرك ان المياه الجوفية اتلوثت بسبب مصانع بطل اكتوبر و ولاده و اصحابه)
بعد هذه المناقشة التخيلية العجيبة اكتشفت ان ابناء المخلوع و انصاره ماشيين بطريقة:نضحي بالأم و الجنين من أجل شهرة الطبيب فهما قرروا انهم يضحوا بمصر و شعبها و مستقبلها من أجل رمز مصر و نسر اكتوبر و بطل الحرب و السلام(اللي اتمنى من كل قلبي ان الصهاينة ياخدوه عندهم يحكمهم سنة واحدة بس عشان المسائل تبوظ منهم خالص)و طبعا التضحية بمصر و شعبها و مستقبلها من أجل كرامة الطاغية هي عملية مبررة اخلاقيا بقدر عملية التضحية بالأم و الجنين من أجل شهرة الطبيب(يعني حاجة كده مقلوظة و أخر باذنجان)و ده طبعا بالنوسبة لموقف المثقفين من انصار المخلوع اللي كلهم قاعدين في التكيف و لو بلطجي اتحرش بمراته يسيبها و يجري مش على الناس اللي قزحت على ميدان التحرير بالجمال و الخيول يوم 2 فبراير ولا كانوا مبلطين في ميدان مصطفى محمود و لا اللي كانوا عاوزين يروحوا مستشفى شرم الشيخ يحموا فرعونهم و استحروا الجو فاستقربوا روكسي لما سمعوا بموضوع مليونية الولاء للجيش
الناس اللي انا تخيلت حواري معاهم عايشين في برج عالي اصلا و مش حاسين بحاجة من اللي انا قلتلهم عليها
لكن الناس بتوع مصطفى محمود و مستشفى شرم و موقعة الفيل دول يبقوا ايه؟لما هما مش من الناس اللي متعاطفة ايدولوجيا مع المخلوع عشان اغنى من انها تحس بمساوئ عصره؟
على فكرة انا عارفة الأجابة على سؤالي بس لأن انا عيلة سيس و صايعة و صاحبة اجندة ايرانية حماسية لبنانية امريكية صهيونية ماسونية ايرلاندية سويسرية مهلبية باذنجانية مريخية مشتركة فأقدر اقول اني اجبن من اني اقولها بصراحة و اتمنى ان كل واحد مننا يجاوب على سؤالي ده بصدق و بينه و بين نفسه عشان مايفضحش اجنداته
و على رأي الدكتور باسم يوسف اكبر مؤامرة ضد مصر هي ايهام الناس ان الثورة هيه اللي مؤامرة و اننا نعجز عن المطالبة بحقوقنا
Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s